Napoli – 18 Janar 2013
Napoli ka dalë fitimtar në Apel, duke arritur që të heqë penalizimin e dhënë ndaj kësaj skuadre për përfshirjen e lojtarëve në çështjen e manipulimit të ndeshjeve që ka mbërthyer të gjithë kampionatin italian. Në vendimin fillestar, Napolit iu hoqën dy pikë, ndërsa futbollistët Kanavaro dhe Grava u pezulluan me 6 muaj, pas deklaratave të bëra nga ish-portieri Xhianelo.
Me heqjen e këtij dënimi, Napoli ngjitet në kuotën e 42 pikëve në renditjen e kampionatit italian, duke iu bashkuar në këtë pozicion Lacios, vetëm 3 pikë pas Juventusit kryesues.
Sigurisht që ky lajm ka entuziazmuar napolitanët, duke filluar nga presidenti Aurelio De Laurentis. "Kjo është një ditë shumë e bukur për Napolin dhe për futbollin italian në përgjithësi. Jam shumë i lumtur për të gjithë, stafin, trajnerin dhe lojtarët. U korrigjua ajo të cilën nuk dua ta cilësoj një padrejtësi, por një pakujdesi në shkallën e parë të gjykimit”, tha ai.
/(e.s) albaniabet/
