Legjonaret – 09 Shkurt 2013
Mesfushori kosovar i Napolit, Valon Behrami të shtunën do të ketë emocione të veçanta kur të futet në stadiumin olimpik të Romës, pasi për kundërshtarë do të ketë skuadrën që e ngriti atë si futbollist, Lazion. Behrami te Lazio kishte luajtur tre vjet (2005-08), ndërsa u kishte hyrë në zemër tifozëve kur kishte shënuar gol kundër Romës në derbin e kryeqytetit italian. Ai në derbin e zhvilluar më 19 mars të vitit 2008 kishte realizuar golin e fitores për Lazion (3:2) në minutën e 92-të dhe me atë gol ishte një nga "fajtorët" që ia pati shuar gjasat Romës për titull të Italisë, përkujton Koha Ditore.
Më të veçantë përballjen e së shtunës e bën fakti se Napoli e Lazio janë sfiduesit e parë të Juventusit për titullin e kampionit të Italisë. Skuadrat po synojnë që të fitojnë për të mbetur ende në garë për titull apo së paku për një vend në Ligën e Kampionëve.
Njëherësh, kjo përballje do të jetë edhe derbi i shqiptarëve në Serie A, pasi te Napoli luan edhe Blerim Xhemajli, ndërsa që pjesë e Lazios janë Lorik Cana, si dhe portieri i ri, Tomë Strakosha.
Xhemajli për ndeshje kundër Lazios është i suspenduar, ndërsa Cana pritet të jetë në bankën rezervë, së bashku me Strakoshën.
Pas 23 xhirove Napoli zë pozitën e dytë me 49 pikë dhe është vetëm tri pikë larg Juventusit. Lazio zë vendin e tretë me 43 pikë, dhe i duhet fitorja për të mbajtur larg vetes Milanin, Interin e Fiorentinën, që po e sfidojnë për pozitën që dërgon në Ligën e Kampionëve.
Të shtunën do të luajnë edhe Juventusi e Fiorentina. Juventusi është duke synuar të mbajë kryesimin edhe më tutje dhe shpreson në një fitore ndaj Fiorentinës.
/(e.s) albaniabet/